صديقتي الذكية .. كيف استعادت زوجها


عندي صديقه عزيزه تزوجت من رجل كبير في السن متزوج قبلها 12 وحده

في البدايه كانت سعيده .. وبعدين صارت حياتها جحيـــم

حاولت تاخذ قلبه وتعيش معاه عيشه لطيفه

قبلت بأشياء وااايد لكنه مو مقتنع فيها

وتطلقت منه 

عاشت ايام اليمه

صكت على روحها الباب

وجابلت السجاده والقبله

ولجأت لرب العالمين

وبعدين؟؟؟؟؟؟؟؟؟؟

ردت عليه

ماهي معاناتها؟؟

ولماذا ردت له ؟؟

وكيف استطاعت ان تستبدل حياة النكد والشقاء الى حياة الهنا والسعادة؟؟القصه صارت قبل سنوات طويــــــــلة

كانت علاقتي معاها قوية جدا

هي بنية كبيرة تعيش وضع صعب جداا مع امها

وحياتها ملخبطة وتحتاج الى الزوج اللي يضفها

كانت بحاجه لبيت تستقر فيه وزوج يشعرها بالأمان

وخطبها …

رجل صالح تقي مشهود له بحسن الخلق والسلوك

وصاحب خيــــــــر ( مادي ومعنوي)

وكان فيه مشكلة وحده …

انه مزواااااااج

ولما سألو عنه اخوانها

وعرفو حسبه ونسبه واخلاقه ودينه

وعقله وثقله حبوه وايد

بس كانو مترددين لأنه اكبر منها ب

30 سنه تقريبا

المهم البنيه كانت تستخير وتستخير وقلبها

يميل له

لما قررت ان توافق عليه

و في وقت الملكه

جاها اخوها

وقال لها تدرين انه اكبر منك ب 30 سنه ؟؟

وعنده على ذمته زوجتين ؟؟

أم عياله و وحده ثانية ؟؟

تقول تفاجأت …

لكن خلاص الناس متجمعين والعشا جاهز وانا اتجهز بالمكياج والتسريحه

والذي منه

فقلت الخيره فيما اختاره الله

و وافقت

وانتقلت الى عش الزوجية …تقول :

حطني ب بيت بسيط جدااا

وانا مو هامني المهم عندي اني اعيش حياة زوجية مستقره اشعر فيها بالأمان

لكن مع الأيام حسيت انه ما يرغب بالصرف علي ابداا

واذا حسسته اني محتاجه لأي شي يشتريه بنفسه

ويقطه علي ( ملابس قيمتها دينار ونص

وانا متقبله ومو هامني

اهم شي عندي انه رجل صالح وحبيب وخلوق

والماده شي ما يهمني ابدااا

فاجأني انه ما يبي اي احد من اهله يكون له احتكاك معاي

ما شفتهم ولا اعرفهم

وبحكم ان رجل كبير في السن

أمه وابوه واخوانه متوفين

واسرته هم  : زوجته العوده و عياله

صرت له الممرضه والزوجه والصديقه

والأخت الحنونه

اطبخ والبس واتسنع

واستقبله بالحب والود

و للأسف  اشوف منه اي تقدم

 

احس انه مو مرتاح

بديت اسأله اش فيك ؟؟

يقول لي مو مرتاح اقول له ليش ؟؟

يقول مادري

واشوفه يروح يوم عند ام عياله ويوم عنده زوجته الثانية ويوم عندي

ويقول ان ام عياله ماله اي علاقه معاها وما تكلمه

أما الثانية يمدحها مدح ويمووووت عليها ويقول لو تزعل ولا تقول طلقني

راح امووووت ما اقدر اعيش بدونها يوم واحد

تقول اسمع كلامه وقلبي يطبخ
اقول وانا ؟؟ ليش ما اخذت قلبه ليش ما حبني

شنو اللي ينقصني ؟؟

مع الأيام صرت أناجره .. و أناقشه

وبشده واقوله ابي حقوقي الشرعيه

ابيك تصرف علي ابيك ……..

وابيك………..

وابيك………

و عطيته  سلسلة من الطلبات والشروط

 

عشان احط لي مكانه و احافظ على حقوقي
وبدت المشاكل …

و دخلنا بدواااامه

وصار ينتقد كل شي فيني

حتى اجزاء جسمي صارت بعينه ( مشوهه)

و كان يقول لي انا اكره فيج ( …….) و (………) و(…..)

أرد عليه …. ياربي هذي خلقة الله شسوي??
حاولت اضعف واتزين

واتجمل بس تبقى اشياء ما تتغير

ومع الايام مليت

وصارت النقاشات بينا حاااااده

هو يعيب وينتقد ويحرم

وانا ارد عليه بالمثل

انت فيك وفيك وفيك

وقام صوتي يعلو ويعلو

وصرت انتفض واعصب

لما جه يوم وقال لي شوفي يا بنت الناس

انا رجل كبير بالسن والمكانه

ورجل صالح

وما اقبل على نفسي باللي تسوينه

تصرفاتج جدا سيئة معاي وانا بصراحه بطلقج

واحتدت النقاشات وكلمه مني وكلمه منا

وشبت الناااااااار

وطلقني ورديت بيت اهلي بااااااااائسه وحزينه وبعدين ؟؟

تقول :

رديت لبيت اهلي ولأمي القاسية واخواني المشغولين

امي ما تبيني التزم بالدين

وباليوم عشرين مره تسبني بأقذع الأسباب

وتوصفني بكلمات وصخه جدااااا وما تنقال

وانا قلبي يدمي

و اعتكتفت على ذاتي

سويت لي منهج خاااص لحياتي

وقمت افكربذاتي وبحياتي

واكتشفت اخطائي مع زوجي واخطاءه معاي

وقمت اتعقل اكثر واكثر

وافكر بحياتي واخطائي

وصفاتي اللي تحتاج تطوير

وقمت اطور شخصيتي واتردد على المحاضرات والدورات

واغلب وقتي

بين مصحفي وسجادتي وصلاتي وقيامي

وصرت انسانه ما لها هم الا الله والدار الآخره

وقمت اتذكر هذي الجمله ( ارجعها فإنها صوامه قوامه(

وقلت بقلبي :

يا رب رد لي زوجي وسنع حياتي معاه

فإني صوامه وقوامه

يا رب

رد علي زوجي

وتميت على هذا الحال شهووور طويله

وكنت كلما اشوفها او اتصل فيها

تقول لي انا واثقه جدااا اني برد على زوجي

اقول لها والله ماشاء الله عليج واثقه من نفسج

ترد علي :

لا ……. واثقه بالله

وفي يوم حصلت المفاجأة

اتصل زوجها بأخوها وقال له انا ما اقدر اعيش بدون اختكم

لازم اردها لعصمتي

وكتب لها رساله مثل المراهقين وحطها على سيارتها

وتفاهمو على كل شي

وفي وقت الرده

قال لها راح اعطيج مهر

10 دك فقط

تقول ما عجبني الوضع

فقلت ما عندي الا ربي

رفعت ايدي لسما وقلت يا رب

ما راح اسقط في الاختبار

بقبل بالقليل من متاع الدنيا

بس اشترطت …

 

اشترطت على الله

 

انه يتصلح معاي وتصير حياتنا سعيده

 

ما تصدقون بعدين اش صار ؟؟؟

عقب فتره انا تزوجت وانشغلت مع بيتي وعيالي

واهي انشغلت مع زوجها

وكانت بين فتره والثانية تتصل واحس انها مرتاحه وسعيده

ومن سفره لي سفره

لدرجة ما كنت اشوفها الا قليـــــل

 

تغط بالأسابيع خارج الكويت  

لكن زوجها كان ما يستغني عنها ابدااا

لازم تصاحبه في السفرات

وقام يقضي معاها اوقات طويــــــــــــــــــله

ومره سألتها غريبه احس ريلج على طول عندج

فردت علي اي ما عنده غيري

سألتها وحريمه وينهم ؟؟

قالت ام العيال على حالها ماتحاجيه ولاتكلمه

 

وعايشه في البيت الكبير مع عيالها وجناينها

وما لها اي علاقه معاه عشرين سنه

سألتها : و الثانية الحبيبه  ( اللي يمووووت عليها ) ؟؟

قالت : طلقها شلوون ؟؟ اصدمتني

قالت والله ما ادخل بخصوصياته اللي اعرفه انه بينهم مشكله

حاده وانهم اتفقو على الانفصال

قلت لها سبحان الله والله دنيا غريبه

اللي كان يضرب بها المثل ويحبها

ويقول : ( لو اطلقها اموووت ؟؟؟ (

 

طلقها بكامل قواه العقليه !!!!

وانتي شلونج معاه

قالت اوووووه انا جدااا سعيده و بأحسن حال

و الفضل لله  

سألتها شلون ؟؟

تقول انا تغيرت وهو تغير وصارت حياتنا حلووووة ومريحه

ومفعمه بالحب

 

قلت لها :

الحـــــــــــــــــــــب الله يا حلو الشعور

كلميني عن الحــــــــــــب شلون دخل حياتكم وغيرها

عقب ما كان ما يحبج و ينتقدج ويعيب على كل شي فيج

لا عيوني هذا الحجي ما يبي مكالمه هاتفيه اش عندج العصر ؟؟

قالت ما عندي شي

واتفقنا انها تسير علي الساعه 5

نشرب شاي ونسولف

لما صارت الساعه 5 الا جم دقيقة

اتصلت باطمئن انها دلت بيتي ( الجديد )

جان تقول انا جدام بيتج

 

وطقت لي هرن J  …. تأكيد انها جدام الباب

عجبتني بالتزامها الدقيق بالموعد

فتحت لها الباب

ودخلت صالة الاستقبال

وبدأنا الحوااار العجيــــــــــــــب

عن الحـــــــــــــــــــــــب بين الزوجين

 

الحــــــــــــــــــــــــــــــــــب

قالت :

في حياتي مع زوجي قبل الطلاق

ما كنت اعرف الحب بالمعنى الصحيح

ولا كنت ادري اني ( اجهل حقيقة الحب )

ما كنت اعرف نقطه مهمه

وهي ان شدة الحب والتعلق وملاحقة الزوج

تطفش

كنت اظن ان الملاحقه

والجدال والنقاش واللصوق بالزوج

تزيد من الحب

وتقرب زوجي لي

 وكنت احسب مطالبتي بحقوقي و نقاشاتي معاه هي ( القوه الحقيقيه )

لكنيه نفر مني و ابتعد وسمعني كلام مؤلم وطلقني

وعقب ما انفصلنا

رجع كل واحد منا لنفسه

وفكرنا بحياتنا بعمق

وعرفنا اخطاءنا

ونوينا اصلاحها وردينا

على بعض

تدرين يا المستشارة الحكيمة هو تزوج قبلي 12 وحده تقريبا

من جنسيات متعدده اصغر مني واحلى مني

وحده منهم حبها بقوة وعاش معاها 14 سنه

وبعدين صارت له مشكله وقرروا الانفصال

طبعا انا ما اعرف مشكلتهم لأنه ما أحب أتدخل بمشاكل غيري

حتى لو شريكتي – فهذا لا يعطيني الحق بالتدخل

و ما قعد الا عندي ليش؟؟

فهمته – واحترمت احتياجاته – حرصت على اشباعها

واهم شي

حــــــــــــــبيته

بس ما خليته كل همي

المحبة العظيمه للزوج توصل الى مرحلة

تضعف الايمان بالقلب

هنا ذكرتني بشئ

ذكرتني ب دورة شرح رسالة العبودية

اللي اقمتها قبل كم سنه

كان ابن تيمية يقول فيها :

ان العباده هي كمال الحب

وكمال الخضوع

و ان العبد اذا تعلق بشخص ( بالحلال)

يقلل ذلك من تعلقه بالله

فالاعتدال بالحب مطلوووووب

وخلتني وهي تتكلم احس بأن قلبي طااااااااااير

وحسيت واحنا نتناقش…… انا راااااااقين جدا

والله قمت اتلفت

واتأكد انا في بيتي

احس اني بحلم احس اني بعالم ثااااني

الله ما اجمل الصديقة اللي ترفع روحانياتج

وتقربج من الله شعور عظيم قالت :

الحب الروحي اعظم من كل شي

احب زوجي من دتاخل يعني احب روحه

ما ابي منه شي

احبه بدون شروط

اتغاضى عن عيوبه

واستمتع بصفاته الايجابية

وتمشي فينا السفينه

قلت لها شلون خذيتي قلبه عقب كل اللي صار ؟؟

قالت مو مني

من

ربــــــــــــــــــــــي

استجاب دعائي و وفقني لفهم زوجي و سددني

تدرين ان لحظات التقرب من الله

واللجوء اليه تزيد من قوتي ؟؟

قلت لها ماشاء الله عليج واااايد ذكيه

قالت : تسمينه ذكاء ؟؟

هذا ايمان ولجوء لله

كملت كلامها وقالت

الحب الجسدي حب مؤقت ياخذ وقت وينتهي

الرجل قد يحب كثيرات

لكن قلبه ما يتعلق بعمق

تعلق روحي من الداخل الا بوحده

قلت لها : تظنين انها مسالة تعود ؟؟

قالت : لا ………. احساس عميق من الداخل وحب

منبعث من الدنيا ومتصل بالآخرة احس انه هذا الزوج ربي عطاني اياه بالدنيا

ويبي مني احسن اليه

( زوجك هو جنتك ……. ونارك )

اخلي حبي لله اعظم من كل حبه

واخلي ربي هو المعبود

اللي اذل نفسي له واربط نفسي برضاه و افر من غضبهنعود للحديث عن الحـــــــــــــــــــــــب الحقيقي

سألتها شلون علاقتكم مع بعض صارت قوية عقب ما كان نافر منج ؟

حبيته

حبيته من قلبي

و لكن ما خليته كل همي

بالعربي الفصيح ما اناجره

ما اقوله غصب عرفني على عيالك او ودني عند اهلك

ولا اسأله عن تفاصيل ما قالها

المهم عندي انه يحبني واحبه

احترمت حقه بالخصوصية

مو يمكن في اشياء وجوانب من حياته ما يحب اني اشاركه فيها ؟؟

هو حــــــــر وما لي حق اقتحم خصوصيته

ولذلك زادت مكانتي بقلبه

سألتها : انتو ما عندكم عيال بس لاحظتكم احيانا تطلعون بر او بحر وتسافرون لأماكن طبيعيه

شلون تقضون الوقت ؟؟مو ملل بروحكم ؟نظرت لي نظرة استغراب

وقالت ملل ؟؟ لما تقضين وقت مع حبيب الروح منين يجي الملل؟؟

انا اطلع معاه المزرعه ونشوي وناكل ونسولف

واتدلع عليه

وألف اشعار بحبه

واتغشمر معاه

اغني الشعر اللي الفته بصوت عااااااالي

وهو يسكتني ويضحك

الملل يجي للي ما يحبون بعض

لكن اللي قلوبهم وارواحهم متآلفه

ما يملون

ما يهمهم العالم كله المهم عندهم انهم مع بعض

ومثل ما قال الشاعر :

فليتك تحلو والحياة مريرة

وليتك ترضى والأنام غضاب

قلت لها اللـــــــــــه

يا حلاة فلسفتج بالحياة رووووعهسألتها عن الاختلاف في وجهات النظر :

– شتسوين اذا اختلفتي معاه بوجهة النظر ؟؟

قالت :

طبعا في حالتي ونظرا لفارق السن الهائل بينا

فهمت وعرفت اني اذا خالفته بينفر مني

وانا ما ابي الغي شخصيتي

لذلك

استمع لوجهة نظره وابدي اهتمامي بكلامه

واستمع له وانا اعبر عن الانصات بكل جوارحي

وبعدين عقب جم يوم ارد انقاش بالموضوع بصورة ذكية

قلت لها شلون ؟؟

قالت :

اتكلم عن الموضوع من جانب مختلف مثلا

اقول له ان صديقتي مرت بكذا وكذا من المواقف

وصار لها كذا وكذا

او اقول له اخوي يقول كذا ولا الشيخ فلان يقول كذا

يعني ( يخالفون رأييه )

فأعبر عن رأيي بطريقه غير مباشرة

وأحسسه ان في ناس يخالفونه بالراي

قلت لها شلون تأمنينه وهو رجل مزواج ؟؟

أتذكر لما خذاج قالج صديقه الشيخ ( فلان) :

– هذا رجل مزواج شلون قبلتي تتزوجينه ؟؟

– ضحكت وقالت سألته مره :

الناس تقول عنك مزواج

رد علي :

أنا اتزوج بالحلال وحظي ان محد فهمني ومشى على ما احب

وما توفقت معاهم

ما يكفيج اني ما عندي اي علاقه بالظلام وهمري بحياتي ما ارتكبت الفاحشة

انا رجل طااااهر ما اقبل بتدنيس عرضي و شرفي
( واحل الله البيع حرم الزنا) قصدي احل الزواج وحرم الزنا
قالت :

أحيانا يطفرني اذا عارضته او قلت له ماني مسافره معاك

يقول لي بتزوج وحده تشاركني رحلاتي ( رحلاته متكررة جدا)

ارد عليه واقول له :

روح حاول اصعد وانزل ودور ولف اذا الله مو كاتب لك

ما راح تاخذ

يرد علي ( صدقتي)

واحيانا اقول له :

تزوج البنات واااايد اخذ احلى واجمل واصغر مني

راح تلقى وايد

بس هل تلقى وحده تحبك وتفهمك وتحترم رايك مثلي ؟؟

يرد علي لا والله ما القى قلت لها ماشاء الله انتي وايد واثقه من نفسج

قالت واثقه من ربي

انا تعودت اني القي بهمومي واحزاني والجا لربي

حتى احيانا لما يأذيني بتصرف ما يعجبني

اقول له بصوت فيه دلع ودلال :

مابي مابي

واذا اصر

اقوله خلاص انا بشتكي عليك

واتوضأ جدامه واصلي واقوله

بشتكي عليك عند ربي
وهو يعم علم اليقين انها مقطوعة الصلة بالبشر

موصوله الصلة برب البشر

فيخااااااااف على نفسه

ويتدارك امره

ويصالحهاقالت لي تدرين انه من فترة سوى عملية خطيرة ؟؟

قلت لها لاه سلامته

والله انا لهيت عنج سولفي لي شلون كنتي تزورينه بالمستشفى وهو ما يبيج تشوفين اهله قالت آآآه

اولا هو فاجأني انه قرر يسوي العملية

ولما قال لي ما قدرت ارد عليه بس دموعي تخرررر

ولما شافني بهالمنظر خرررت دمعته

 

اللي ما تخر لو شنو

وما تكلمت ولا حرف

ما قدرت اتحجى

وصلته المستشفى وقعدت معاه ورحت

وطلب مني عدم التواصل معاه بحكم ان عياله وجناينه واحفاده بيكونون معاه

وانا ما حبيت اضغط عليه وهو في وضع صحي ما يسمح

لاحظو ذكاءها وحكمتها فهمت انه ما يبي يقلل من شأنها وان مكانتها محفوظه – وان هذا التصرف لا يعني انها ما تسوى عنده – واحترامها لنفسها انتشر على حياتها واحترمت رأي زوجها – لو وحده مو واثقه من نفسها ولا واثقه من ربها جان قالت اي بس ما يبيني و تهاوشت معاه )

قلت لها شلون كنتي تطمئنين عليه ؟؟

تخيلو شنو ردت علي ؟؟

تقول اروح المستشفى كل يوم واقعد مقابل دريشة غرفته

اشوف وجهه واكحل عيوني بشوفته واتطمن عليه

واريح قلبي بمتابعته من عبر الدريشة

لما نتبهت لي موظفه لي موظفه بالمستشفى

وسألتني : شسالفتج ليش مجابله الدريشة

فقلت لها انا زوجه ثانية ولا احب احرج زوجي مع اسرته

ويكفيني اني اتواصل معاه بدون ما يدري

هذا يا بنات الحب الحقيقي

الحب النابع من داخل الروووح والقلب

الحب اللي كله رضا وقبول

الحب اللي ما فيه تشرط ولا مشاكل

يكفيها انها تحبه — ما تطالبه بأي شي

سألتها وبعدين ما زرتيه بالمستشفى ؟؟

قالت كلمني وطلب مني ازوره بوقت محدد

ولما دخلت لقيت عنده ولده اللي كبري ( 50 سنه)

واول ما دخلت وشفته عن قرب و تلاقت عيني وعينه

عقب ايام النظر من الدريشة

صبت دموعنا بدون وعي

حتى ولده انصدم لما شاف دموع ابوه

وقال يا جماعه ذكرو الله

وطلع وخلانا بروحنا بالغرفهبقى شي مهم يا بنات

انا قلت لكم ان ظروف البنت صعبه

معاشها معاش تقاعدي

وما عندها اي مورد مالي

و امها تحتقرها ( بسبب تدينها والتزامها
وما لها مكان اوبيت تلجأ له لو صار لها اي شي

اخوانها وحريمهم مو سنعين ولا عندهم تآلف

وزوجها من عائله كبيرة جدا بالكويت

واظن انه ثروته بعشرات الملاييين

فاللي يتبادر الى الذهن ان تطلب منه ( بيت او شقه تضفها)

قالت لي :

وايد حريم يقولون لي ان زوجي عند خير و ملايين

وانا ما اعرف كم يملك دينار ولا مليار

وما يهمني ابدااا

واحيانا يقولون لي

طلبي منه يسجل بإسمج بيت

لكني واللــــــــه ما يهمني ولا اقدر انزل نفسي واطلب منه

شي مادي احس ان الحب والتقارب الروحي بينا قوي

ما احب افسده بالماديات

وبعدين عقب عمر طويل اذا صار فيه شي ( مات)

شنو بينفعني فيه البي او الفلوس عقب

ما افقده ؟؟ ولا ملاييين الدنيا تقدر تترس مكانه

عظيمه يا صديقتي ورائعه

هذا هو الحب الحقيقي

حب بلا عتاب

حب بلا الم

حب بلا شكوى

حب روحي لا يعرف الماديات

يسمو ويعلو فوق كل الهموم والمشاكل

وصدقت حين قالت حب في الدنيا …. يتصل بالآخره

تمت وبحمدلله

 

Leave a comment

Leave a Reply

4 comments on “صديقتي الذكية .. كيف استعادت زوجها

  1. عايده الكوس on said:

    كانت خوش قصه ، صراحة استمتعت فيها و باحداثها و بقراتها ، و اللجوء الى الله سبحانه و تعالى بكل حال من الاحوال ، و عجبتني انها ذكية و عاقله ، و عجبتني لما قالت بصلي و اشتكي عليك و لما احترمت راي زوجها و اهو بالمستشفى و كانت صبوره ، الله يوفقها و يهنيهاااا ان شاء الله .
    و يعطيكم العافيه .

  2. رشا الجميلي on said:

    رائعة قصة مؤثرة جدا وتعلمت منها كثيرا على الرغم ان احداثها نوعا ما تشبه قصتي لكن الذي تعلمته كثير الصبر واللجوء الى الله نعم اللجوء الى الله يقربك منه وتفهمين الحب الحقيقي للكل وان الحب الروحي الاعظم والاكبر لله الواحد القهار ربي يوفقهم

  3. ندى on said:

    ماشاءالله تبارك الرحمن .. الله يسعدهم ويهنيهم ياارب
    ماشاءالله زوجة ذكية جدا .. مأجورة بإذن الله لها الفردوس الاعلى من الجنة .. سبحانك ربي ما اعظمك .. سبحانك ربي ما ارحمك .. سبحانك ربي ما اكرمك .. هذه رسالة بسيطة جدا للتقرب الى الله واللجوء اليه في كل جوانب الحياة

  4. أم فهد العجمي on said:

    ماشاء الله قصه حيل حلوه وماشاء الله على صاحبة القصه مدى طول بالها وصبرها ولجوئها الى الله وهالشي اللي غافلين عنه وهمنا شلون نرضي الزوج وعلى امور بسيط نلجاء الى الغضب والهواش وفهمنا الخاطى للموضوع وتفسيره على كيفنا بمشاعرنا مو بالعقل

    الله يجزاج خير استاذه باسمه
    ويوفق صاحبة القصه
    ويارب الهدايه

%d bloggers like this: